Darr Lagta Hai
“East or West, India is the best”
Bachpan mein hum gaate the.
Diwali ki mithai, aur Eid ki sevai,
Jam jam ke khaate the.
Par aaj usi desh ki haalat dekh ke
Aankhein bhar aati hai.
Jahaan insaano mein insaaniyat
“Yeh desh hai veer jawaano ka”
Bachpan mein hum sunte the.
Phir unhi gaano ko zor zor se
Antaakshri mein gaya karte the.
Aaj ke baccho ke liye
Humne kaise udharan dhar diye hai?
Unki nanhi zubaano pe jadd diye hai.
Jis desh mein saath milkar
Hum har tyauhar manaate the.
Republic day ke March Past ke liye
Tasbeeh ya rudraksha nahi dekhe jaate the.
Usi desh mein aaj ek dusre ko
Padosi maarne kaatne nikalte hai.
Dukaano aur gharo ke saath saath
Saare armaan bhi jalte hai.
Jis desh mein, birthday ke din
Har class jaake hum toffee batte the.
Us toffee ko khaana se pehle
Mazhab nahi maloom kiye jaate the.
Usi desh mein baache aaj
Laathiyon aur goliyon ki awaaz sunte hai.
Pados waale uncle ke haath mein,
Mithai ke bajaye petrol bomb dekhe ke darte hai.
Jis desh mein chhatt pe jaake banchpan mein hum
Pakdam pakdai khela karte the.
Holi ka gulaal lagane se pehle
Surname nahi poocha karte the.
Ussi chhatt pe aaj bacche
Kisi dangai ko sunai na dejaaye
Isliye zor se ro bhi nahi paate hai.
Jis desh ki galiyon mein hum
Bachpan mein cricket khela karte the.
Batting ki baari ab kiski hai
“Kapdon se hi pata” nahi kiya karte the.
Unhi galiyon ko tum dekho aaj
Kaise bilkul sooni padi hai.
Kal raat hui dehshat ki yaadein
Darr ka sannata odhe khadi hai.
Humare bachpan ki haseen yaadein
Humare bachon ko nahi mil payegi?
Galli cricket or chatt pe patang ki bajaye
Inke zehen mein dango ki yaadein reh jaaengi.
Inke dilo mein hum khauf bhar jaaenge
Iss baat se darr lagta hai,
Pyaar ke bajaaye nafrat sikha jaaenge
Comments
Post a Comment